KAN LO HRE LO A NI

KAN LO HRE LO A NI
I lo chawr chhuahna khua leh chhungkua hi kan han thlir a, a mak kan ti. In khua te lah chu 'Nazaret-ah thil tha a chhuak ngai em ni?' an lo tih thlawt khawpa mite hmuhsit khua a ni a. I pa chu tualchher mistiri. I Nu pawh thingtlang nu mawl pangngai ve mai.
I Nu leh Pate hi mi naranah pawh naran takzet, ropui leh hausak lama vantlang hnuai lam, chhuan tur thil ropui reng reng kawl lo chhungkua an ni. Chutiang chhungkua chu Lal meuh pianna awmah tuman kan lo ring ngai lo va. Kan hai ta reng che a nih kha. Kan atnaah min ngaidam ang che - kan retheihna tawmpui turin Chungnungberin hmun tlawm ber i rawn thlang a ni tih kan lo hre lo a ni.
Bethlehemah khan Nazaret nupa mawlmang ve tak te kha zan khawvawt leh thim hnuaiah mangang leh beidawnga siamin an awm a. Thlen in an hnawn tak tlat avangin - nang, an rila rah hmasa ber chu ran inah, ranthlengah pian tir i lo ngai ta a nih kha. Kha hmun kha lei leh van Lal chu sawi loh, mihring pangngai pianna awm hi a ni mawlh lo! Mahse, kan mitin a hmuh phak lohvah, kan ngaihtuahnain a hriat phak lohvah i chatuan thiltum chu dahin a awm tlat si! Kan fel lohnaah min ngaidam ang che - thihna ata min chhanchhuak a, boralna lak ata min tlan tura lo kal, Chhandamtu i ni tih kan lo hre lo a ni.
I lo pian phata thenkhatin chibai an buk duh dan che leh kan lo lawm ve dan che chu inthahna leh inrawtna rapthlak hmangin a ni. Kha thil rawva tak kha sim ta mai lovin kan la ching zui ta zel a. I piancham a lo thlenna tur ni tam pawh a awm tawh lo tihah khawvel hmun hrang hrangah rawng taka in suasam te, thisen darh nuaih mai te chu a va rapthlak em . Sawisen a ni lo. Keimahni leh keimahni thisen kan inchhuah a, kan inthat a, kan innghaisa tawn a, kan inrikrap tawn mek zel a. Hlau leh thlabarin kan siam mek bawk. Kan sualnaah min ngaidam ang che - thim hnuaia thute tana eng, Pathian leh mihring leh thilsiam zawng zawngte inkara remna thlen tura lokal - Remna Lal i ni tih kan lo hre lo a ni.
Khawvel lawmnan a lokal i nih laiin, khawvel takin keinin i piancham kan lo lawm thin a. I piancham hi chawlh hlimawm tak pakhat, nuam tawl leh hlim hlawp bawlna hunah kan hmang a ni ta ber a. A piancham neitu ber kan hre chang tawh lo che a, retheihna leh lungngaihnain a chim mek kan chhehvela mite lah kan ngaihsak hek lo. Kan duh danin kan nung, kan che, kan awm a ni ta ber a.Kan khawlohnaah min ngaidam ang che - hmangaiha i rawn pian chhan hringfate lak atang hian thinlung rohlu i duh a ni tih leh December ni 25 a ral ruala ral ve lo tur ‘Krismas tak’ chu keimahniah thlen tir i duh zawk a ni tih kan lo hre lo a ni.