SPORT NGE POLITICS ?

Politician tam tam tak ten Sports hi Politics khelhna hmanrua atan an lo hmang tawh thin a. Ti fuh fe fe pawh sawi tur a awm. India ramah ngat phei chuan hetiang thil hi 'remchangah' hmangin, Sports association hrang hrang ah rawng huai nih tumin theihtawp an chhuah a. Neih leh tha ui loin khelmual thar a, an zuan luh hmain khelmual pakhat atan Sports hi an hmang ve thin reng a ni. Mi thenkhat chuan loneitu te hmakhaw ngai bertu niawmin an in lar a, thenkhat chuan zirlai pawl ah te an hmang hmasa te te bawk thin. Heng mite hi an dem awm chuang lo. Politics khelmual a an inkhelh tak tak hmain, hengah hian an lo in warm up hmasa a ni ve mai.



Football khawvel a club ropui leh hlun, Italy mai pawh nilo Football inpui Europe khawmualpui huap pawh a, club ropui leh lawmman chi hrang hrang lo hui tawh tu AC Milan neitu chu Italy Prime Minister pawh lo ni tawh tuna AC Milan President ni mek chu Silvio Berlusconi a ni tlat. India ramah pawh tuna Union Minister zinga mi Congress pachal Priya Ranjan Das Minshi hi India ram a football thuneitu sang ber All India Football Federation ah hun rei tak chhung chu President nihna hauh tu a ni a. A ni hi India ram a Football ngaisang berna state W Bengal atanga rawn chhawr chhuak niin, tun thlengin AIFF ah president a la ni mek.Mizoram ah pawh mumal taka Football Assocition din a nih khan, an pawl hruaitu hmasa ber inthlanna kum 1976 a an neih khan an hruaitu hmasa ber te zinga a mi chu Mizoram Chief Minister pawh lo ni reng tawh Pu Lalthanhawla chu MFA President hmasa ber a atan thlan a ni a. A kaihhruaina hnuaiah Mizoram Football Association hi din niin, tun thleng hian Mizoram a pawl lian ber te zingah a ding chho ta a ni.
Khawvela Cricket Association hausa ber leh India rama Sports Association zinga thil ti thei ber Board Of Cricket Control of India (BCCI) a hruaitu nih chu state tenau deuh a Minister nih ai chuan a thlan awm zawk ti hial a sawi thin a ni a. Hei vang tak hian BCCI inthlan hi a boruak pawh a sang thin hle a. India rama political pary lian tak tak te pawh an inrawlh chang a tam a, a chhan chu he pawl ropui a an pary mi leh sa hruaitu nih chu India rama an party hlimtha pakhat a nih miau vang a ni. Hun kal tawh deuh khan tuna Railway minister ni mek leh Bihar Chief Minister pawh lo ni tawh Laloo Prasah Yadav pawh hi BCCI a hruaitu nih tum a ni a. Chumi nihna kawng chu Bihar state a cricket hruaitu nih a ni tih a chiang a. Bihar state a cricket hruaitu thlanna ah pawh a chuh ve hial a nih kha.
Heng thil hi a mak lo. Sports hi thalai te ngainat leh lawm a ni a. Hei vang hian he huang chhunga atanga rawn ding chhuak te hi chu thalai ten an hmelhriatin ngaihsan an hlawh vang a ni. Tun hnai deuh atang khan Mizoram ah pawh Thalai 'hiptu' nih tumin Party hrang hrang te pawhin an manifesto ah thalai te an dah pawimawh ta deuh vek a nih hi
Hun kal tawh deuh atang khan Mizoram ah chuan MLA leh Minister te hian badminton khelh an uar thar hle a. Tun a kan Chief Minister pawh hi badminton khelh peih a ni a. A ni bakah hian speaker Pu Lalchamliana hi a khel peih pawl a ni bawk awm e. India ram hmun dang a minister leh MLA te hi la inkhel peih hlawm ve tak maw. Chutiang khawp a infiamna lam a inhmang leh la inkhel peih ram hruaitu kan neih lai hian kan infiamna mual leh kan infrastructure neih te erawh a chau lu lai hlawm hle a. Boxing a tui em em CM kan nei a, state ta bil boxing ring pakhat pawh kan la nei lo cheu a. Congress hun lai khan Sports Minister te chuan World Cup a hmunah an en a ni awm a. Khatih hun laite khan an inkhel enna hmun stadium that zia a hmuh khan rual awhna chang a hria em ? A hria a nih chuan chu lam hawi chuan hma a la em ?
Maharatra CM hlui Sarad Pawar khan BCCI President a neih theihna turin India ram hmun hrang hrang ah a campaing nia sawi a ni a. A sawi uar deuh te phei chuan State Assembly inthlanna tur atana a tan ang bawkin BCCI inthlanna atana a campaing nen danglamna a nei lo anti hial.