AW ZORAM !

Aw ka hmangaih Zoram
Suihlung phang lo la
Sual bawih a tang reng turan ka phal lo che
Aw tunah tho tawh teh
Khua a var hma hian inpeih a hun ta

Zoram khawvar hun chuan
Hriat ngai lo te nen
Hnehna puan zar hnuaiah
Hnehna hla thar mawi
Kan sa dial dial ang

Hmangaih ngai lo te nen
Kan in hmangaih tawh ang
Duhsak ngai lo te chuan lawmna kan hmu
Thinlung lungngai beidawng
Chau a rum tawh ten
Hlimna kan chang tawh ang

Read more...

MEETING MINUTE
A Hmun : Crecendo School Of Music, Chanmari
A Hun : Ni 14 Aug 2008 Tlai Dar 5 : 00
Member Present :
1. Rinzauva 2. Mamuana 3. Hmingsanga 4.Tetea
5.Mafaka 6.Dara 7.Tlanzova 8.Ethel
Meeting tan hmain thingpui kan in a, rorel tan a nih tak tak hmain sap nu pakhat kan sirah a thu a. Kan thurel a hriat ve kan hlauh vangin a awm laiin ro tak tak kan rel duh lo, a kal hnuah rorel kan tan.
THUREL I :
Nula sawm tur kan ngaihtuah a, Tv Rinzaua kan innghahna ber a ni a. Mahse chet chhuah tak tak dawnah beisei ang a phak lo.Nula sawm ve ngei kan duh si a, sawm mai tur kan hriat mai loh hnuah Nl Ethel (LPS) chuan a thian hnai vai te tlawmngai tur in a sawm kual hlawm a. An lokal thei hlawm dawn niin kan hria a. Nula lamah chuan 'nil' lo turah kan in ngai a. Ethel chhungah kan lawm hle. Midang sawm turte.
1. Pu PL Liandinga & Zotei
2. Ethel & Co
Kan chaw eikhawm tur hi a zau thei ang berin thehdarh nise, lokal ve tur chuan kan phut kher lo.
THUREL II :
Chaw eikhawmna hmun atan Pu Mapuia huan Zemabawk a mi hotu pain a dil lo a, Pu Mapui’an a huan a chaw eikhawm min phalsak avangin kan lawm hle.
THUREL III : Mawhphurhna hetiang hian kan insem
1. Catering - Tetea & Mamuana
2. Transportation - Mafaka
3. Light & Sound - Crecendo
4. Hla copy - Dara
5. Drinks - Tlanzova
THUREL IV :
Rules & Regulation mumal tak hetiang hian kan siam
1. In nghahkhawmna hmun - Crescendo, Tlai dar 3 : 30
2. Emo thei ang berin inchei tur.
3. Kamis tumahin beng luh loh tur a ni a, smart shoe pawh bun loh tur.
4. Mahni meizial theuh zuk tur.
5. Tumah thil inhrilh bik loh tur, kan vaiin kan 'bright' vek.
6. Chairman leh receptionist ruat bik kan awm lo a, kan vaiin kan ni nghal vek.
7. Khua khua sawi loh tur a ni a, Aizawl a piang leh seilian vek kan ni.
8. Tumahin insuk tur ken loh tur.
9. Haw hma rawt awih loh.
10. Tel ve thei lo te duh tawka rel awih.
11. Mahni in control zo lo chu phungin a kheuh ang a, out next match a ni bawk ang.
12. Lam kan thiam hlawm vak loh avangin rimawi remin insul pel mai nise.
13. Chaw ei hma darkar khat leh chawi ei kham hnu darkar khat chhung mobile phone switch off vek tur a ni a. Hmun khatah dah khawm tur a ni.
14, Mobile phone switch off chhungin lakloh thila phone hmang duh an awm a nih chuan, minute khat ah Rs 100 chawiin a hmang thei ang a. Pawisa chawi tling khawm chu remchang danga chaw eikhawm nan hman a ni ang.
15. Chawi eikhawmna seng so hi simple te in mipa hoin Rs 1000 den den thawh khawm tur.
16. Heng topic te hi sawi awih a nilo, Sport, Politics, Music
17. Tuman ram vei rih loh tur.
Read more...

KA HRE RENG TAWH ANG

Ka awih thei lo, ka ring thei lo, kan in hriatna pawh a la rei lo lo a. Tunah heti mai a min duh thu i sawi hi ka ring lo ni loin, awih chu a har khawp mai tiin min hrilh a, a sama chul niap niap a.
Mipui sang tel teh meuh pungkhawm chuan. an hmaa dawhsan eng pup chu chu an thlir thup a. Ngah an nei a, an mi ngah lo lan hun tur nghakhlel takin an thlir a. A nghaktu lam tan minute 5 pawh rei tak a ni tawh... Minute 5 a ral a, dawhsan lam eng pup chu a thim rup a, mipui an au nuaih nuaih a. Rei a thim hman lo, dawhsan a rawn eng tan riai riai a. Hmeichhe pian thiam leh hmeltha a rawn ding zan a. Eng a eng zual a. Thim a bo a. Ri a reh a. Rimawi a ri a. Aw mawi a fawn a. Mipui an lam a. A lam lo ten ngun em em in zai an ngai thla a. Tleirawl zai thiam chu lawm a hlawh a. A zai zawhin mipui thawm a ring a. A hmelhriat nih ve ngawt pawh thil hlu a ni.
Kum sawm a vei a. Mahse khami zan 'hlim zan' tia an sawi ve mai thin zan atang khan nula zaithiam kha a rilru ah a riak a. Hriat pawh theih dan tur ngaihtuahin rilru pawh ka seng ve fe tawh a. Mahse kawng a kaw lo. Mahni seh mualah tul leh buai em em in hun kan hmang ni te hian kan ngai ngawt a.
Kei chuan ral atangin a hming ka hria a, a hmel pawh ka hria. A ni erawh chuan ka hming a hre lo chu thuhran nise, ka hmel phei chu a hrelo leh zual ang. Tlangkam atangin hmun dangah a lehkha zir turin a awm dawn tih ka hriat ve ni te khan 'ruak' riau a inhriatna te ka lo nei ve a. Miten min hriatpui ve lo mahse, min hre ve lo tu, keiin ka vei ve em em, ngai chuan a kur hian ka lo kur duam duam a ni ber a.
Hetiang hi a lo ni maw di ngaih lunglen an tih chu ka ti a. Ngaih loh tur ka ngaih a bang lo a. Theihnghilh tur kha ka hrereng a. Tlangval ve ta fam chuan, ngaihzawng dang te pawh kan nei ve bawk thin a. Mahse chhungrilah hian 'La-i' zun chuan min phuar tlat a. Rilru zawng zawng ka pe thei lo a. Engtikah emaw chuan min hriat ve rinna ka nei a. Ka beiseina chuan min tung nung hram hram a ni ber e.

Read more...

HRINGNUN HI A MAWI MANG E

Favang ni a liam a, thlasik a intan a, khaw vawtin zingah kut a hmet a, ngaihtuahnain Krismas lam a a hawi tawh a. Rinna thla meuh zarin Bethlehem bawng in leh chhevel kan fangkual a. Aizawl bazar ah mipui an pung zual a. Zokhaw lam unau te hmel hmuh tur a tam tial tial a. Zion Street velah a ngaite in Boney M leh chul thei lo Siampuii Sailo te zaithawm hriat tur a awm leh tan tawh bawk a. Lusun khawhar leh tleitir dawn tawite pawh Krismas zun zai zamin ang khatin a hrut a. Kohhran hrang hrang pawhin Krismas hlim taka hman tumin camping leh crusade thawm ri a ri ring tan hle tawh bawk a.
Krismas Ni a lo thleng a. Naupang ten an thawmhnaw thar nen Biak In lam an pan leh sap sap ang a. Biak In leh an chhehvelah an thawmhnaw thar neih chungchang leh an dawhthlak an dawh dan leh an toys neih chungchang te chu an titi tui ber a ni leh ngei ang. Biak In dar a ri ang a, kumpui ling let a kan nghah leh kan er ber Krismas ni lo thleng ta chu tiin Biak In lam kan pan leh sung sung ang a. Inkhawm ngai lem lote pawh Krismas a nih miau avangin inkhawm pawh hun dan zawng ai chuan kan tam leh ngei ang. Krismas chibai tih pahin kut thing meuhin kan inchibai kual leh den den ang a. Thalai lam pawh 'urlawk zan' hmang zo hlim an nih avangin mut chhuak chung chungin an inkhawm leh hlawm ngei ang le. Sawi zel dawn ila sawi tur a tam khawp ang.
Ruaitheh Ni a ni a, khuan te vik atangin fatu leh tufa buai hmasa pawl te chu an phei buai char char tawh bawk ang a. Chhun lamah nu leh pa zaikhawm pawh khuangpui leh khuangte chum chilhin an zai tui viau mai thei bawk. Mahse khatia Krismas lo thleng tur kan er a, neih zawng zawng leh khawlkhawm sa zawng zawng pawh ui lo a kan hman liam lai leh at kan so luih luih lai khan, Krismas bazar a naupang pakhat leh a nu kha chuan min va han 'khawih' ve aw. Lal lo piang kha engtin tak chibai han buk ve ang maw ?
A kawr pawl tep hrip hrep chu a tan 'engkim' a ni ngei ang. Nipui khawlum boruak awp churh hnuiah chu kawr chu a nilen pui a. Fur khaw hnawm leh thlasik khawvawt hnuiah pawh chu nen bawk chuan a hun a hmang a. Midang tih danin Krismas bazar ah an rawn kal ve ngei a. Mipui zi nuaih nuaih karah a nu chuan a paw ba hlat a. Miten bakery cake leh chhang tui tak tak eitur an lei khawm tun tun lai khan, chhang khawro aqng reng tak chu a ei tiam tiam a. Naupang dangte duh ang leh neih ang neih chu a thil chak a ni tih a thil ngen dan atangin a hriat theih a.
An hnungah ka kal zel a. An tawng ka hre phak a. Naupang chuan "Ka nu G.I Joe ka min lei rawh aw. Kawr thar pawh Masi hunah ka lei ang che i tih kha... a ti a.A nu chuan aw damdiai hian " Bawihte i pa kha la dam nise la chu i duhzawng leina tur hi chu a thawk chhuak ve thin kha a ni a, tunah chuan min awm loh san ta si a, engtin nge maw kan tih ang le, kei lah damdawi lei a ngai reng bawk nen, a va buaithlak ve aw.. I duhzawng leina pawh kan nei rih lo kumin chu " a ti a. Mahse chu naupang chuan engmah a hrethiam lo a niang. " Mawh ka nu min lei rawh " tih pahin a tap ta vak a. An tawng ka hriat atang chuan an chanchin hriat chian ka chak zual sauh a.
Ka zui zel a. Hreh takin "Ka pi.." Ka tawng a hre lo. A aia ring deuh zawkin "Ka Pi..." A nau puak a siam rem a, A sam a huih fel te te a. Ka lam a lo hawi a. Nang ni nufa chu eng nge lei in tum a, a chep teh reng nen ? Min chhang lawk lo a. A hmelah lawmna aiin lungngaihna hmel a lang a. A ngawi vang vang a. Thaw a la te te a, ka zawhna chu a chaltlai deuh mah mah a hriatna ka nei a. Ka inchhir hman viau a. Mi an tam avangin min nek sawn deuh chhen a. Mahse kan zawhna ka zawt tawh laklawh a, k din chilh lak lawh tawh a, ka pan hnai zel a.
Min chhang dawn tawh lo emaw tih hnuah ka zawhna chu ti hian a chang a."Hei ka fapa lawmzawng lei tur hian kan rawn chhuak ve a, mahse pawisa erawh kan nei chuang lo. In a kan awmin a tap reng bawk si a, ka rawn chhuahpui ve a, a tih chi loh khawp mai. Thil lei a ngen a, mahse a leina tur ka nei si lo" A hmel a pawr fap a, thlasik lai mah nise a thlan, a bek ah a luang deuh zaih zaih bawk a.
A nau puak chu a hawi kual velh velh a, a nu nen kan inbiak lai pawhin a thil duh zawng lei sak turin a nu chu a nawr chhen a. A nu tih ngaihna hre lo chuan, an hrawk leh deuh khar khar thin takna in ban zai a rel duh chuang si lo a.
Kan inbiak lai chuan rilru a vak thui hman hle a. A fapa duhzawng lei sak turin a kum tir atanga a sum lo khawl tawh chu a pa damdawi man atan an hmang zo tawh tih te, a nu hrisel lo tak a nih avangin an sum neih ang ang damdawi man atan a hmang zo tih te hriatpui chuan thaw a lo pik ve tak zet a. Hna thawktu leh sum hai luttu ber lah inhlawh tur a awm tawh si lo a.
Mipui in nek luih luih karah engtin tin emaw kan in hlauh ta daih a. Hmuh leh nge tumin ka zawng chiam a, Mahse ka hmu zui ta lo. Ngaihtuah zui loh thei an nilo. Kan in hmuh remchan lai khan eng nga ti nge ka pawisa neih ang tlem te tal pawh ka pek lo tiin ka inthiam lo hle a.
Krismas bazar lai hian khatiang mihring kha an tam ka ring thin. Sualna pawh nei lo, vanduaina vang liau liau a retheihna khur a thla hawlh a. Hringnun hi a nihna ang pawh a hmachhawn ngam lo, mite hmel eng ringawt pawh zah em em hi an va tam dawn em !
Khawvel sualna vanga boral tur mihring te chanchhuah kan nih theihna tur atan 'Nau' lo piang kha a pian zan in van angel leh zaipawl ten lawmin zaiin an lo awi a. Chibai buk turin ram hla tak atangin mi an lo pungkhawm a. Nau lo piang chu a lo puitlinin midang te tan Malsawmna a nih theihna turin nunna meuh hlain Kraws ah a lo tuar a. Krismas a lo thlen hian midang te tan malsawmna ni turin tih theih eng nge maw tal i nei ang. Neih leh khawl khawm zawng zawng mahni pumpui tan ngawt a hman hi a hnung kan zui duhdan a nilo. A hniak hnunga kan zui kan theihna turin entawn tur min hnut chhiah a. Remna leh muanna awm lohna hmunah remthu leng rawh se ti tur kan ni a.
Vaivut a siam hi vaivat ah vek kan kir leh hun a la thleng theuh dawn a. Chutiang hun chu a lo thlen hma leh tih theih kan neih lai ngei hian hian "Hringnun hi a mawi mang nge" kan tih theihna turin Krismas ah kher lo pawh nitinin, midang te tan malsawmna ni turin inbuatsaih la.Hringnun hi a mawi mang nge i ti kumkhua tawh ang.

Read more...

Ka Hmangaih Reng Ang Che

A biangah mittui a luang ngiai ngiai a. A inhnit faih faih a, insum tum hle mahse, a thei hlawl lo a. A pindan lam a pan ding nal nal a.
Nizan ah kha chuan nang nen hlim em em in kan leng dun a. Tudang mah kan ngai lo a, duhthawh leh inthlahlel takin kan inkuah vawng vawng a... duhthu kan lo sam dun nasa mai a.. Duhthusam ang zelin khawvelah hian awm theih nise kan va hlim zual dawn em. Damchhung khawsak ngaihtuahna hian min hlah thlem a tum der mai silo a. Duhthusam angin khawvel hi a awm thei lo a. Nang nen hreh tak chhungin kan inthen a tul rih si a nih hi. Mumang ram mai cheng ka ni tih ka hriat chhuah meuh chuan khua a lo var tan tawh a, dan pangngai te in ka mut hmunah ni eng chuan min rawn chhun leh set set a.
Kan bul tan dan pawh mawl te a ni. Thiantha te zarah inhmelhriat kan ni a. Khawvel leh a chhunga chheng te zingah hian kan tawn ang tawng an tam tawh a. Keini pawhin kan tawng a, hmangaihna hi engchiah nge maw a nih le tiin vawi tam tak kan inzawt tawh thin a nih kha. Hmangaihna hi mi pakhat atanga chhuak tur a ni lo a, a lehlam lehlam atanga chhuak tawnin intawng tur a ni e tih kha kan thutawpna a ni fo a.
` Loh theih loh avangin tlang hrangah kan awm a tul a. Boruak mel ah pawh teh ila, mel sing chuang teh meuhin kar min dan a. Ngai em em leh thlahlel ngawih ngawih chhungin kan inthen a tul rih si a. Thinlung lam hi lo inzawm lo nise, hmangaihna khawvel hi a va 'nunrawng' ve aw tih vawng vawng chang kan ngah ngawt ang. Hmangaihna in kan hnarah 'nunna thaw' a thaw lut a. Chu chu kan tan chakna a ni.
Dam chhung khawsak nawmsak duh lutukna hi khawi atanga lo chhuak nge? Thinlung meuh suih zawm tawh kan pahnih karah pawh zu tla zep thei a. Ngai em em chhungin kan inthen a tul maw? A hma a kar min dantu kha zawng a lo va nep em ! Nilo, a ni thei lo... Hmangaihna pawhin awmzia a neih theih loh ai chuan.. Aw van mite u i mit lo chhing ula, i beng chu lo chhu ngawng mawlh teh u.. Hausa leh rethei min dai dang tu sa dai thiat tur hian tharum kan thawh teh ang.. Zahngai ula min hrethiam mawlh teh u
I kiangah awm zel tur leh i bul a awm zui zel chu ka thil thlakhlelh ber ni mahse i kawng daltu ka ni dawn si a. Kiang mai tang nge.. Mahse hei erawh theihnghilh ngai suh ang che " Ka hmangaih reng ang che"
Kan sulhnu hlim lai ni leh lungngaihna kan hmachhawn zawng zawng te kha kei chuan ka vawng reng ang. Mangtha tiin ka thlah ang che. 'Mangtha'. Keimah vang hian mittui seng lo hram la, kei hi i mamawh ber ka nilo tih hrehciangtu chu keimahni. Hmangaihna meuh luah lan a, nawmsakna thlakhlelh vanga inthen a tul a nih si chuan nawmsakna chu pawm hmawm mawlh teh khai. Kei chu ka tling lo e, ka tlin lo e. Mahse kei chuan ka hmangaih reng ang che.
He lei hi a vir ngaiin a vir reng ang a, a vir kualna lamah i tan hun tha leh nawmna chu herchhuah pui teh se. Hlimna leh lawmna awm thei zawng zawng hi i tan nise ka ti a. Chu zawng ai chuan hmangaihna ka duhsak ber che. Ka hmangaih reng ang che.
Inthen hlen tur a kan inbiak tawp ni chuan a biangah mittui a luang ngiai ngai a, a in hniat faih faih a. A pindan a pan ding nal nal a.. Ka hmangaih reng dawn si a.

Read more...

SEX AND THE CITY

Zan a ni a. Aizawl khawlaiah mihring vak vel pawh an tam tawh lo hle a. Chutih hunah chuan Zodin Cinema hall bul leh a chhehvelah chuan hmeichhe thnekhat an rawn inlar tan tawh a. Khawi lam nge an pan ang tih ngaihtuah awm takin chu hmeichhia chuan a Taxi hman 'than' tak bulah a thu mek bawk a. Chutih lai chuan chu hmeichhia rawn beiseitu pa pakhat an lam panin a rawn kal mek bawk a. A mipa zawk chu a hmel en chuan tlangval a ni tawh lo tih a hriat theih a. A hmeichhia lah a hmelah beisei tur dang a nei lo. A jeans hak pawh a balin a uk tawh hle a. A kum a tam lo tih a hriat a, mahse a 'hna' chu thawh a ngai tlat si. An in be ru sar sar a. Taxi chuan vung takin an tlan chhuak zui a. Thup dawn chuan thutak nise, zah dawn leh sawt silo, chhuan dawn leh mualpho thlak thlawn ni bawk si, Khawpui service chungchang kan rawn 'service ' ve e.
Nawh chi zawrh leh Mizo
State dangah chuan nawhchi zawrhna hmun an siam a. Mizo te chuan thiani te lane tiin a hming kan vuah sak mai a. Nawhchi zawrh a sum dawnna hi khawvel sum dawnna zingah pawh a upa ber te zinga mi a ni hial awm e. Mizo te zingah nawh chi zuar an awm tanna hun hi fiah tak sawi theih ni chiah lo. Zoram buai lai khan India sipai an rawn lut a. India sipai nunrawng tak tak te khan Mizo hmeichhe tam tak an pawngsual a, hmeichhe tam tak ram tui leilo in an siam a.Thenkhatin sipai an hlauh luat vangin an hlauh tlawn a, an taksa sipai hnena hlan ta mai pawh sawitur an awm bawk. Kum 1960 leh 70 velah khan hmeichhe pakhat chu AR Camp ah hian inzuar thin a awm a ni tih hriat a ni a. Chutia in zawrh chu dan in a phal loh thil a nih avangin chu nu pawh chuan a 'dawr' chu a khar chhunzawm ve leh mai a. Buai a ziaawm deuh a. Mizoram chu Union Territory dinhmunah hlan kai kan ni a. India sawrkar pawhin sum leh pai hmangin nasa takin min vur a. Bel te phai thei lo tiin duhtawkin sum leh pai kan tlan a. Zawlkhawpui thalai te ngat phei chuan an nun an thlahdah a, zep tur a awm lo a, zu leh sa lamah hlimna zawngin an tlan a, mipat hmeichhiatna lamah pawh an nun a zalen hle a. Atta lane velah phei kha chuan thingpui dawra hmeichhe thawk thenkhatte chu a rukin zan lamah inzuar zui ta pawh sawi tur an awm a ni awm e. Ram a ralmuang tan a. Kum 1980 chho velah khawpui lamah kan pem lut sup sup a. Chutih lai chuan thenawm ram Burma lam mite pawh Aizawl ah an lut deuh huk bawk a. Hetia mihring kan han pun tak deuh hukah chuan hmeichhe thenkhat an inzuar thin a ni tih hriat a ni leh a. Heng hmeichhia te hi a tam zawk chu hnathawh tur zawng a Mizoram a rawn kal Burma lam mi an tam ber a. Thenkhat chu hur herh vang hrim hrim a chutianga awm te pawh an awm bawk.
A hmingah Khawpui Service
Hetia an in zawrh takah siah chuan heng hmeichhia te hi dawr theih an ni a. A duh apiangin an dawr a. Mi tam takin zu leh drugs rui chungin heng hmeichhia te hi an kawp a. Mahse dawr man pawisa pek an ngai a. An indawrna hmun chu Hotel ah te, khaw daifem deuh ah te, ram pa laileng pawh a a ni thei a, vawk in bul tih vel pawh a ni thei bawk. Khawtlang hruaitu te pawhin chutiang mite chu man ve thin bawk mahse tlem lam aiin zual lam a pan a. Inzuar an tam tial tial a. Kar loah chutianga inzuar thin hmeichhia te chuan hming an nei thuai a. A hmingah Khawpui Service vuah an ni a. Tun thlengin KS tih hming chu an pu zui ta ni.
An pung tual tual
KS chu an pung tual tual a. A tir lamah heng hmeichhia te hi hriat an har ang reng viau a. Mahse an lo tam takah chuan tlawm leh zah an sawi thei tawh lo a. In zep tum laiin ual au takin an rawn in lar ngam ta zawk a. Khawlaiah awlsam takin hmuh tur an awm tawh a. Heng hmeichhia te engvangin nge an in zawrh tak ngawt mai le ? A chhan ni thei tam tak a awm. A tlangpuiin hlimna zawn luat vanga hum sual dai, chhuah leh tum chhuang lo, he hmuna intlak ral ta hi a tam ber chu an ni awm e. Thenkhat ve thung chu zu leh ruih hlo an duh luat vangin helam a kal zui ta pawh an awm. An duh ang an hmuh theihna a nih dawn phawt chuan pawisak an nei lo a, an neih dawn loh ai chuan an 'taksa' hralh mai pawh an pawi ti lo a. Hei hian in zawrh duh hialna pawh a thlen bawk. Retheih luat vanga he kawng zawh pawh an awm a. Retheih lutuk chuan pawisak a awm tawh lo a. Sumdawng tur te leh thil dang eizawnna kawng zawh turin an lehkha zir thiamna ten a pha lo bawk. An duh ve reng vang piah lamah retheih luat vangin kawng dang thlan tur an nei lo a, chuvanga in zuar ta mai a ni awm e. Tin, chhugkaw kehdarh atanga rawn zi chhuak an awm bawk. An naupan laia an nun kaihhruai tu mumal nei lo te an ni a. Kaihruaina mumal an neih loh vangin an duh hawi zawng zawngin an tal a, pawisak leh tih hreh an nei lo a. Midang ang bawkin chulam kawng chu an zawh bawk a ni tiin a sawi theih bawk ang.
Kum bithliah a awm lo
Nang chu i la naupang a rawn kal ve suh an ti thei ngawt lo. He sumdawnna huang chhungah hian kum bithliah a awm lo. Chhan hrang hrang vanga he huang chhunga rawn tla lut an ni a. An chungchang zir chiangtute chuan KS zingah a tam ber chu kum 21- 30 inkar anni a, a dawttu kum hi han enteh a mak asin, kum 10 - 20 in kar an ni tlat. Kum 31-40 in kar chu an tlem deuh a. Kum 41 - 50 inkar hi an tlem ber a. Anni hi zawng an kul cho tawh pawh a ni mahna. Tichuan heng zingah hian a tam ber hi chu zokhaw lam atanga khawpui a eizawnna kawng rawn zawh an ni a. A tirah chuan thingpui dawr leh mi inah te an awm a, chumi hnua 'fawr' thlang ta zawk an tam hle.
Tute nge an Fawr pui
Zirchiangtu te leh anmahni enkawltute, anmahni ngei pawhin an sawi dan chuan dawrtu tam ber chu hnam dang mipa an ni. Chung zingah chuan Mistiri leh Vai Mutia an tam ber a. Hetih lai hian Mizo pawh an fawr pui tho bawk. Mizo pa anmahni dawrtu tam ber chu Aizawl lam mi aiin Zokhaw lam mi an tam zawk a. Chutah pawh tlangval aiin pa an la tam zawk an la ti leh zel a. Chung zingah pawh chuan Aizawl a bill la leh dawr bungraw la tur a lokal, sum tam tham deuh nei te phei chu kawp an nuam leh zual a ni an ti. Thenkhat sawi dan chuan bazar a chaw hmeh zuar anga awm mahse 'inhlawh' zuai duh pawh tam tak an awm a ni an ti bawk. Sipai camp lama kal tawk awm tho mahse, hnam dang sipai chhuti lo fawr pui tawk pawh an awm bawk.
Thenna Ramri chu !
KS ho hi anmahni chuan chumi kha mi class a mi chu ka ni e an ti miah lo nachungin awlsam deuh tak chuan thlir hran theih an ni awm e. Anmahni zir chiangtu te chuan Aizawl khawpuiah hian KS 250 - 300 vel bawr awmin an sawi a. Heng mite hi tihian an then darh theih a ni an ti.
Super Class : Hetiang mite hi chu hriat harsa tak an ni. Chhungkaw mumal leh pangngai tak atanga rawn chhuak an ni a. Secret Service ti pawhin an sawi thin a. A ruk thei ang berin an awm a. Incheina lamah te, an khawsak dan phungah pawh inzuar chi an ni awm lo mang nge tih tur chi an ni a. Mahse hetiang mi hi an awmve tlat si. A tam zawk hi chu lehkha thiam, college hial pawh rap pha an ni a. Thenkhat phei chu Office hna thawk te pawh an awm a ni awm e. Hetiang ho hi chu a duh tu leh mamawh tu te chuan an ko mai a. An man pawh a to khawp mai. Zan khatah a tlangpuiin Rs 1000 - 2000 te an in chhiar a. Thian tha tak an nei a, an thiante kaltlangin midang nen an indawr thin .
First Class : Super Class nen an danglam teh chiam lo a. Super Class nen an danglamna chu Super class te chu inzuar lo mahse an hna thawhna dang atangin hlawh dang an nei a. First class erawh chuan hlawh dang an nei ve lem lo a. In zawrh chu an inhlawhna leh an ei bel ber a ni thung si a. A hrechiangtu te chuan hetiang mi hi Aizawl ah hian mi 30 vel an awm niin an sawi a. A tam zawk hi pasal then tawh nuthlawi kan tih ang chi an ni a. A in atangin 'hna' thawk turin an chhuak ber a. Zu an in thei a, damdawi pawh an khawih hreh lem lo bawk a. Anmahni ei khawp an thawk chhuak a. An inchhiar dan chuan Rs 1000 - 1500 man vel a ni.
SECOND CLASS : He class ah hi chuan mi 50 atanga 60 bawr vel an awm a. An chhungte nen khawsa tlang an ni a.Ni hnih khat te an fawr a an lo haw leh a. A chang chuan kar khat chuang te pawh an han in zuar kual lawp lawp bawk a. Hetiang mite hi chu zu an in nasa a, damdawi pawh an khawih nasa hle a. Khawlaiah pawh hmuh tur an tam a. Third class te ngawt ai chuan an ti tuai pawh a la nalh deuh zawk a. Anni hi zan khatah Rs 300 - 500 vel an rate a ni.
THIRD CLASS : Anni ho hi a class hniam ber an ni a. A tam pawh an tam ber a, khawlaiah pawh awlsam takin an hmuh theih a. Zu leh drugs chu sawi loh dendrite thlengin an rui duh a. Chhung leh khat mumal an nei lo a. An dam loh nikhua pawhin haw na tur an nei nei chuang lo a. Home hrang hrang leh NGO ten Drop In Center an siamah an tlu lut ber a. An rate pawh a chhe khawp fun te khat leisak tu hnenah pawh an 'taksa' an hlan phal a. Ti fuh an in tih chuan zan khat ah Rs 300 te an hlawh chhuak ve thin.
Lehkha zir maw !
Lehkha thiam leh zir sang nise 60 % chuang te hi chuan he an sumdawnna ah hian an barh luh a rinawm loh a ni. A chhan chu zirna kawng pangngai zawh nise hna thawh tur tha zawk an hmu ang a, nundan phung pangngaiin an nun zawk a rinawm tlat. KS zingah hian a tam ber chu pawi 5 pawh passed lo an tam ber niin an chanchin hrechiangtu ten an sawi tlat a. Pawl 10 thleng zir hi awm leh a. A hrechiangte sawi dan chuan Aizawl ah hian KS kan tih ang chi hi mi 250 - 300 vel an awm niin an sawi a. Chung zingah chuan lehkha zir sang lo hi an tam ber chu an ni.
Engtin nge kan tih ang
A kum telin 'dawr' nei thar an awm zel a. Kan khawlai boruak a ralmuang lo tial tial a. Zu kan khap a, an rui reng tho bawk a. Drugs a hluar reng bawk si nen, Heng thilin a ken tel pakhat chu 'fawr' a ni. Fawr in a hrin chhuah chu hri tha lo HIV/AIDS thlengin kan kawt kaiah an lo zuang lut mek bawk a. Inkai chhawn tamna ber lah mipat hmeichhiatna hman lamah a ni an ti bawk si. Heng laka kan him theihna tur hian engnge kan tih tak ang le ? Home hrang hrang kan nei. Kumkhua a awm theih a ni silo. An enkawl hnuah hian engtin nge kan tih ang le. Mi thahnem ngai te chuan hetiang mi lo enkawl tu an awm nual, an fakawm. Thenkhat chu sam siam te, puan thui te an zirtir a, hlawhtling te pawh an awm an ti. Mahse hei hi a tawk lo. A ler lam kan thuai a, a hnuai lamah a thar a rawn in tan zel bawk si a. Hei vang tak hian chhungkua leh zirna sikul ah te hian inzirtirna tun aia kan dawn tam a tul tawh a ni. Chutih lai chuan chutiang dawng pha lo mi tam tak an la awm bawk. Mizo te hian Sex Education chungchang sawi hi kan hreh a. Inzirtir a hun tawh tak zet a ni. Media a chak tawh si a, TV leh CD a film leh serial kan en ho te hi a him tawk em ? Kan lehkha bu chhiar te hian sual lam kawnga min hruai lut thei em ? Ngaihtuahna fim tak hmangin kan vela min chim mektu hi tihtak zet a kan ngaihven a hun ta. Kristian state kan nih avangin khawvel hriatah sang takin 'chaih' ni mah ila, kan vela ring lote hian an theih dan danin min 'hlum' thlak an duh a. Chanchin tha kan hril hi ropuiin hlu mahse kan Jerusalem ber hi a bawlhhlawh tlat chuan a famkim an dawng thei ngai lo ang. Tisa thil kan tih hian thlarau lam thil a khawih tel nghal zel lo em ni ? Ralkhat romei chhaiha zam ral ringawt turin Pathianin keini hi helai kilah hian min dah ngawt lo.
Read more...